Կրծքագեղձի վերականգնում
Կրծքագեղձի վերականգնողական պլաստիկան (ռեկոնստրուկտիվ մամոպլաստիկա) վիրահատական բուժումից կամ վնասվածքից հետո կրծքագեղձի վերականգնման վիրահատությունն է: Պլաստիկ վիրաբույժը նման վիրահատություն է կատարում կրծքագեղձի քաղցկեղի հետևանքով մաստէկտոմիայի (կրծքագեղձի մասնակի կամ ամբողջական հեռացման) ենթարկված պացիենտներին։ Ռեկոնստրուկտիվ մամոպլաստիկա կարող է առաջարկվել նաև, եթե կնոջ մոտ առկա է կրծքագեղձերի բնածին թերզարգացում կամ բացակայություն:
Կրծքագեղձի պլաստիկ վիրահատության հակացուցումները
Կրծքագեղձի պլաստիկ վիրահատությունը ինվազիվ վիրահատություն է, որը ներառում է հիվանդին անզգայացման վիճակի մեջ մտցնելը: Վարակիչ և քրոնիկ հիվանդությունների առկայությունը պահանջում է հիվանդի վիճակի նախնական շտկում կամ նույնիսկ կարող է հանգեցնել վիրահատությունից հրաժարվելուն: Ուստի, ինչպես ցանկացած վիրաբուժական միջամտության դեպքում, անհրաժեշտ է նախնական խորհրդատվություն նեղ մասնագիտացված բժիշկների հետ:
Կրծքագեղձի պլաստիկայի հակացուցում կարող է դառնալ՝ պացիենտի մոտ նշված պաթոլոգիաներից մեկի հայտնաբերումը.
Սրտանոթային համակարգի հիվանդություն,
Հեպատիտ B կամ C,
2-րդ տիպի շաքարային դիաբետ,
Աուտոիմուն հիվանդություններ,
Քրոնիկ հիվանդությունների սրացում,
Տեղային բորբոքում նախատեսված վիրաբուժական միջամտության հատվածում:
Որոշ դեպքերում հիվանդի համար ավելի նպատակահարմար է կրծքագեղձի վերականգնումը հետաձգել՝ այս պրոցեդուրայի համար առավել բարենպաստ ժամանակահատվածի: Կրծքագեղձի վիրահատության հետաձգման ամենաակնհայտ պատճառն է հղիությունը:
